މި މަހު 25 ގައި ފެށޭ ފުވައްމުލަކު އޮފީސް ބެޑްމިންޓަން މުބާރާތް 2010 ގައި މުޅިއެކު ހަ ޓީމް ބައިވެރިވެފައިވާ ކަމަށް މި މުބާރާތް އިންތިޒާމްކުރާ ފަރާތުން ބުނެފިއެވެ.

ޒުވާނުންނާއި ކުޅިވަރުގެ މަރުކަޒު ޒޯން 8 ކާއި ފުވައްމުލަކު ބެޑްމިންޓަން ޑިވަލޮޕްމެންޓް ގުޅިގެން ބާއްވާ މި މުބާރާތުގައި ބައިވެރިވެފައިވާ ޓީމްތަކަކީ ހާފިޒު އަހުމަދު ސުކޫލް، ފުވައްމުލަކު އޮފީސް، ޏ އަތޮޅު ތައުލީމީ މަރުކަޒު، ފުވައްމުލަކު އަތޮޅު އޮފީސް، ފުވައްމުލަކު އަތޮޅު ހޮސްޕިޓަލް އަދި މަދަރުސަތުއްޝައިޚު މުޙައްމަދު ޖަމާލުއްދީން (އެމްޖޭއެމް) އެވެ.

"މިހާރު ބައިވެރިވެފައިވާ ހަ ޓީމް ވަރަށް ފޯރިއާއެކު ދަނީ ޕްރެކްޓިސް ކުރަމުން. މުބާރާތް ކުޅުމަށް ހަމަޖެހިފައިވާ އެމްއެންޑީއެފް ހޯލުގައި ވަނީ ތިން ކޯޓުގައި ކުޅެވޭ ގޮތަށް ހަދައި ހަވީރާ ރޭގަނޑު ޕްރެކްޓިސް ކުރެވޭގޮތަށް ކޯޓްތައް ބަހާފައި." ފުވައްމުލަކު ބެޑްމިންޓަން ޑިވަލޮޕްމެންޓް ކޮމިޓީގެ ވައިސް ޗެއާމަން ނުއުމާން އަލި ދީދީ ވިދާޅުވިއެވެ.

ނުއުމާން ވިދާޅުވީ މުބާރާތުގައި ބައިވެރިވެފައިވާ ޓީމުތަކުން ވަރަށް ބޮޑަށް ތައްޔާރުވަމުން އަންނަކަމަށާއި ފުވައްމުލަކުގައި ބޭއްވޭ އެންމެ ވާދަވެރި އެންމެ ފޯރިގަދަ ބެޑްމިންޓަން މުބާރާތަށް މި މުބާރާތް ވެގެންދާނެ ކަމަށް ލަފާކުރެވޭ ކަމަށެވެ.

މި މުބާރާތުގެ ޗެމްޕިއަން ޓީމަކަށް ޒުވާނުންނާއި ކުޅިވަރުގެ މަރުކަޒުން ވަނީ 2000 ރުފިޔާ އަދި ރަނައަޕް ޓީމަށް 1000 ރުފިޔާގެ ފައިސާގެ އިނާމް ކަނޑައަޅާފައެވެ.