ޏ. އަތޮޅު ތަޢުލީމީ މަރުކަޒުގެ (ސްކޫލް) ބޯޑުން ހުސްވެފައިވާ ދެމަގާމަށް ކުރިމަތިލުމުގެ ފުރުސަތު އިއްޔެ އެމަރުކަޒުން ހުޅުވާލައިފިއެވެ.
އެމަރުކަޒުގެ ބޯޑުން ހުސްވެފައިވާ ދެމަގާމަށް ކުރިމަތިލައްވަން ޝައުޤުވެރިވާ ފަރާތްތަކުން އެކަމަށް އެދި ފޯމު ހުށަހެޅުމުގެ ސުންގަޑިއަކީ 2010 މާޗު 11 ވާ ބުރާސްފަތި ދުވަހުގެ ހަވީރު 4:00 އެވެ. މެންބަރުކަމަށް ކުރިމަތިލުމަށް އެދޭ ފޯމު އެމަރުކަޒުގެ އޮފީހުން ލިބެންހުންނާނެކަމަށް އެމަރުކަޒުން ވަނީ ބުނެފައެވެ.
ތަޢުލީމީ މަރުކަޒުގެ ބޯޑުން ހުސްވެފައިވާ ދެމަގާމަކީ ބެލެނިވެރިންގެ ތެރެއިން ތިއްބަވާ 5 މެންބަރުންގެ ތެރެއިން 2 މެންބަރަކު ވަކިވުމުގެ ސަބަބުން ހުސްވެފައިވާ ދެމަގާމެވެ. އެދެމެންބަރުން މަގާމުން ވަކިވީ އެދެމެންބަރުންގެ ބެލެނިވެރިކަމުގެ ދަށުގައިވާ ދަރިވަރަކު މިއަހަރު އެމަރުކަޒުގައި ތަޢުލީމު ޙާސިލުކުރަމުން ނުދާތީއެވެ.
ސްކޫލް ބޯޑުގެ ގަވާއިދުގައި ބުނާގޮތުން ސްކޫލް ބޯޑުގައި ބެލެނިވެރިންގެ ތެރެއިން އިންތިޚާބުވެވަޑައިގަންނަވާ މެންބަރުންނަކީ، އެމެންބަރުންގެ ބެލެނިވެރިކަމުގެ ދަށުގައިވާ ކުއްޖަކު އެސްކޫލެއްގައި ތަޢުލީމު ޙާސިލުކުރަމުން ދާ ބެލެނިވެރިއަކަށް ވާންޖެހޭނެއެވެ. ބޯޑުގެ ދައުރު ހަމަވުމުގެ ކުރިން ބެލެނިވެރިންގެ ތެރެއިން ހުންނަވާ މެންބަރެއްގެ ބެލެނިވެރިކަމުގެ ދަށުގައި ވާ ދަރިވަރަކު ސްކޫލުން ވަކިވެއްޖެނަމަ އެމެންބަރަކު މެންބަރުކަމުން ވަކިވާނެއެވެ. އެހެންވެއްޖެނަމަ ބައި އިލެކްޝަނެއް ބާއްވައި ދައުރުގެ ނިމެންދެން އެމަޤާމަށް މެންބަރަކު އިންތިޚާބު ކުރަން ޖެހެއެވެ. ސްކޫލް ބޯޑުގެ ދައުރަކީ 3 އަހަރެވެ. އެހެންކަމުން ކޮންމެ ތިންއަހަރަކުން ތިންއަހަރަކުން ބޯޑުގެ އިންތިޚާބު ބާއްވަން ޖެހޭނެއެވެ. މިހާރު އިންތިޚާބުކޮށްފައިވާ ސްކޫލް ބޯޑުތަކުގެ ދައުރު ހަމަވާނީ 2011 ވަނަ އަހަރުގެ ދިރާސީ އަހަރު ނިމުމުންނެވެ.