ބައިނަލް އަގުވާމީ އަންހެނުންގެ ދުވަސް ފާހަގަކުރުމަށްޓަކައި ފުވައްމުލަކުގައި ޚާއްސަ ހަރާކާތްތަކެއް އިއްޔެ ހިންގައިފިއެވެ.

އެގޮތުން ފުވައްމުލަކު ސްކޫލުގެ ގައިޑުން އިސްނަގައިގެން ގައިޑުންނާއި ޓީޗަރުންގެ އިތުރުން އާންމު ބައެއް ފަރާތްތައް ހިމެނޭ ގޮތަށް ރަށުގެ ބައެއް ސަރަހައްދުތަކުގައި އިއްޔެ ހަވީރު ވަނީ ހިނގާލުމެއް ބާއްވާފައެވެ. ތަފާތު އެކިއެކި ލިޔުންތަކާއި ޕޯސްޓަރުތައް ހިފައިގެން ބޭއްވި މިހިނގާލުމުގައި ދަރިވަރުންގެ އިތުރުން އަމިއްލަ ބައެއް ފަރާތްތަކުންވެސް ވަނީ ޝޫޢޫރު ފާޅުކޮށް ވާހަކަ ދައްކާފައެވެ.

މީގެ އިތުރުން ރަށުވެށި ޖަމްޢިއްޔާގެ ފަރާތުން އިންތިޒާމުކޮށްގެން ފުވައްމުލަކު ޒުވާނުންނާއި ކުޅިވަރުގެ މަރުކަޒުގައި ވަނީ ވޮލީ މެޗަކާއި ނެޓުބޯޅަ މެޗެއް ކުޅެފައެވެ. ވޮލީ މެޗުގައި ބައްދަލުކުރީ ރަށުވެށި ޖަމްޢިއްޔާގެ ޓީމަކާއި އޯޕަން ހޭންޑުގެ ޓީމެކެވެ. މިމެޗު ސީދާ ތިން ސެޓުން ކާމިޔާބުކުރީ ރަށުވެށި ޖަމްޢިއްޔާގެ ޓީމެވެ. ނެޓުބޯޅަ މެޗުގައި ބައްދަލުކުރީ ރަށުވެށި ޖަމްޢިއްޔާގެ އޭ ޓީމާއި ބީ ޓީމެވެ. މިމެޗު 14 ޕޮއިންޓު 3 ޕޮއިންޓުން ކާމިޔާބުކުރީ އޭޓީމެވެ.

އަންހެނުންގެ ދުވަސް ފާހަގަކުރުމުގެ ގޮތުން ފުވައްމުލަކުގެ ސްކޫލްތަކުގެ އެސެމްބްލީގައި އިއްޔެ ވަނީ ދުވަހާ ގުޅޭގޮތުން ވާހަކަ ދައްކާފައެވެ.